ଚେନ୍ନାଇ: ଚାରି ଦିନର ରୋମାଞ୍ଚକର ରାଜନୈତିକ ଡ୍ରାମା ପରେ ତାମିଲନାଡୁର ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ‘ଥାଲାପତି’ ବିଜୟ। ନିଜର ପ୍ରଥମ ସମ୍ବୋଧନରେ ସେ ସ୍ପଷ୍ଟ କରିଛନ୍ତି ଯେ, ରାଜ୍ୟ ଶାସନରେ ସେ ହିଁ ହେଉଛନ୍ତି ଶକ୍ତିର ଏକମାତ୍ର କେନ୍ଦ୍ର। ବିଜୟ କହିଛନ୍ତି, “ମୋ ବ୍ୟତୀତ ଅନ୍ୟ କୌଣସି ପାୱାର ସେଣ୍ଟର ରହିବ ନାହିଁ।” ଏହା ଦ୍ୱାରା ସେ ସ୍ପଷ୍ଟ କରିଛନ୍ତି ଯେ ତାଙ୍କ ସରକାର କୌଣସି ମେଣ୍ଟ ସହଯୋଗୀଙ୍କ ଚାପରେ ରହିବ ନାହିଁ।
ନିଜକୁ ‘ଥାମ୍ବି’ (ସାନ ଭାଇ) ଭାବେ ପରିଚିତ କରାଇ ସେ କହିଛନ୍ତି, ଯଦି କେହି ସରକାରକୁ ଅସ୍ଥିର କରିବାକୁ ଚାହୁଁଛନ୍ତି, ସେମାନେ ନିଜ ମନରୁ ଏହି ଚିନ୍ତାଧାରା ‘ଡିଲିଟ୍’ କରିଦିଅନ୍ତୁ। ସରକାର ଗଠନ ପାଇଁ ଆବଶ୍ୟକ ୧୧୮ ସଂଖ୍ୟା ପାଇବାରେ ସାହାଯ୍ୟ କରିଥିବାରୁ ସେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ‘ଭାଇ’ ବୋଲି ସମ୍ବୋଧନ କରିବା ସହ ଅନ୍ୟ ସମସ୍ତ ସହଯୋଗୀ ଦଳକୁ ଧନ୍ୟବାଦ ଜଣାଇଛନ୍ତି।
ବିଜୟଙ୍କ ସହ ୯ ଜଣ ନେତା ମନ୍ତ୍ରୀ ଭାବେ ଶପଥ ନେଇଛନ୍ତି। ଏଥିରେ ଅଭିଜ୍ଞ ନେତା କେ.ଏ. ସେଙ୍ଗୋଟ୍ଟାୟନଙ୍କ ସମେତ ଆଦାବ ଅର୍ଜୁନ ଓ ଡାକ୍ତର ଟି.କେ. ପ୍ରଭୁଙ୍କ ଭଳି ପ୍ରମୁଖ ଚେହେରା ସାମିଲ ଅଛନ୍ତି। ବିଜୟ ଜନସାଧାରଣଙ୍କୁ ପ୍ରତିଶ୍ରୁତି ଦେଇଛନ୍ତି ଯେ, ସେ ଦୁର୍ନୀତିମୁକ୍ତ ଶାସନ ପ୍ରଦାନ କରିବେ ଏବଂ ଲୋକଙ୍କର ଗୋଟିଏ ବି ଭୋଟ ସେ ନଷ୍ଟ ହେବାକୁ ଦେବେ ନାହିଁ।