Jantar Mantar Protest: ଜନ୍ତର ମନ୍ତର ଆନ୍ଦୋଳନ ମାମଲାରେ ନୂଆ ମୋଡ଼, ଯୁବକଙ୍କ ଶରୀରରୁ ବାହାରିଲା ୭ଟି ପେଲେଟ୍

ନୂଆଦିଲ୍ଲୀ: ଜୁଲାଇ ୨୦ରେ ଜନ୍ତର ମନ୍ତରରେ ହୋଇଥିବା ଛାତ୍ର ଆନ୍ଦୋଳନ ସମୟରେ ପୋଲିସ ପେଲେଟ୍ ଗନ୍ ବ୍ୟବହାର କରିଥିବା ଅଭିଯୋଗକୁ ନେଇ ଚାଲିଥିବା ବିବାଦ ମଧ୍ୟରେ ଏକ ମେଡିକୋ-ଲିଗାଲ୍ ରିପୋର୍ଟ ସାମ୍ନାକୁ ଆସିଛି। ସୁପ୍ରିମ୍ କୋର୍ଟରେ ଆବେଦନ କରିଥିବା ୨୫ ବର୍ଷୀୟ ଶେଖ୍ ଇରସାଦ୍ ମନସୁରୀଙ୍କ ଅସ୍ତ୍ରୋପଚାର ପରେ ତାଙ୍କ ଶରୀରରୁ ୭ଟି ପେଲେଟ୍ ସଦୃଶ ଧାତବ ଖଣ୍ଡ ବାହାର କରାଯାଇଥିବା ସୂଚନା ମିଳିଛି।

ଲେଡି ହାର୍ଡିଂ ମେଡିକାଲ କଲେଜର ଅପରେସନ ରିପୋର୍ଟ ଅନୁଯାୟୀ, ଜୁଲାଇ ୨୧ରେ ସାଧାରଣ ଅଚେତନ ଔଷଧ (General Anaesthesia) ଦେଇ ଅସ୍ତ୍ରୋପଚାର କରାଯାଇଥିଲା। ସେହି ସମୟରେ ମନସୁରୀଙ୍କ ଶରୀରର ବିଭିନ୍ନ ଅଂଶରୁ ଏକାଧିକ ଧାତବ ବସ୍ତୁ ବାହାର କରାଯାଇଥିବା ରିପୋର୍ଟରେ ଉଲ୍ଲେଖ ରହିଛି।

ମୁଣ୍ଡ, ବେକ ଓ ଆଖି ପାଖରୁ ବାହାରିଲା ଧାତବ ଖଣ୍ଡ

ଡାକ୍ତରୀ ରିପୋର୍ଟ ଅନୁସାରେ, ମନସୁରୀଙ୍କ ମୁଣ୍ଡ, ବେକ, କାନ୍ଧ, ଓଠ ଓ ବାମ ଆଖିର ଆଖପାଖରୁ ପ୍ରାୟ ୨ରୁ ୩ ମିଲିମିଟର ଆକାରର ଧାତବ ଖଣ୍ଡ ଶଲ୍ୟଚିକିତ୍ସା ମାଧ୍ୟମରେ ବାହାର କରାଯାଇଛି।

ମନସୁରୀଙ୍କ ଦାବି ଅନୁଯାୟୀ, ତାଙ୍କ ଶରୀରରୁ ମୋଟ ୭ଟି ପେଲେଟ୍ ସଦୃଶ ଧାତବ ବସ୍ତୁ ବାହାରିଛି। ତେବେ ତାଙ୍କ ମୁହଁରେ ଆହୁରି କିଛି ଧାତବ ଖଣ୍ଡ ରହିଥିଲେ ମଧ୍ୟ ଅଧିକ କ୍ଷତିର ଆଶଙ୍କା ଥିବାରୁ ଡାକ୍ତରମାନେ ସେଗୁଡ଼ିକୁ ବାହାର କରିନଥିବା ସେ କହିଛନ୍ତି।

ହସ୍ପିଟାଲ ହେପାଜତରେ ସାମ୍ପୁଲ, ସୁପ୍ରିମ୍ କୋର୍ଟରେ ଶୁଣାଣି ଜାରି

ଅସ୍ତ୍ରୋପଚାରରେ ବାହାର କରାଯାଇଥିବା ଧାତବ ଖଣ୍ଡଗୁଡ଼ିକୁ ହସ୍ପିଟାଲ କର୍ତ୍ତୃପକ୍ଷ ନିଜ ହେପାଜତରେ ରଖିଥିବା ସୂଚନା ମିଳିଛି।

ଉଲ୍ଲେଖଯୋଗ୍ୟ, ଜୁଲାଇ ୨୦ର ଆନ୍ଦୋଳନରେ ପେଲେଟ୍ ଗନ୍ ବ୍ୟବହାର ହୋଇଥିବା ଅଭିଯୋଗରେ ଆହତ ହୋଇଥିବା ୫ ଜଣ ବ୍ୟକ୍ତି ସୁପ୍ରିମ୍ କୋର୍ଟର ଦ୍ୱାରସ୍ଥ ହୋଇଛନ୍ତି। ଏହି ମାମଲାର ଶୁଣାଣି ବର୍ତ୍ତମାନ ସର୍ବୋଚ୍ଚ ନ୍ୟାୟାଳୟରେ ଚାଲିଛି। ମାମଲାର ଅନ୍ତିମ ନିଷ୍କର୍ଷ ଏପର୍ଯ୍ୟନ୍ତ ଆସିନାହିଁ।