ଭୁବନେଶ୍ୱର: ପ୍ରସିଦ୍ଧ ରିଆଲିଟି ସୋ’ ‘ଇଣ୍ଡିଆନ୍ ଆଇଡଲ୍ ସିଜନ୍-୧୬’ ର ବିଜେତ୍ରୀ ହୋଇଥିବା ଓଡ଼ିଶାର ଗାୟିକା ଜ୍ୟୋତିର୍ମୟୀ ନାୟକଙ୍କୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆନ୍ତରିକ ଅଭିନନ୍ଦନ ଓ ଶୁଭେଚ୍ଛା ଜଣାଇଛନ୍ତି। ଜାତୀୟ ସ୍ତରରେ ଓଡ଼ିଶାର ନାଁ ଉଜ୍ଜ୍ୱଳ କରିଥିବାରୁ ମୁଖ୍ୟମନ୍ତ୍ରୀ ତାଙ୍କୁ ‘ମାଟିର ଝିଅ’ ଭାବେ ଅଭିହିତ କରି ପ୍ରଶଂସା କରିଛନ୍ତି।
ମୁଖ୍ୟମନ୍ତ୍ରୀ ନିଜ ବାର୍ତ୍ତାରେ ଉଲ୍ଲେଖ କରିଛନ୍ତି ଯେ, “ଇଣ୍ଡିଆନ୍ ଆଇଡଲ୍ ସିଜନ୍-୧୬ ର ବିଜେତ୍ରୀ ହୋଇ ସମଗ୍ର ଦେଶରେ ଓଡ଼ିଶାର ନାମ ଗୌରବାନ୍ୱିତ କରିଥିବା ଆମ ମାଟିର ଝିଅ ଜ୍ୟୋତିର୍ମୟୀ ନାୟକଙ୍କୁ ମୋର ଅଶେଷ ଶୁଭେଚ୍ଛା ଓ ଅଭିନନ୍ଦନ। ତାଙ୍କର ଏହି କଳାତ୍ମକ ସଫଳତା ଓଡ଼ିଶାର ଅସଂଖ୍ୟ ଯୁବପ୍ରତିଭା ଏବଂ ଉଦୀୟମାନ କଳାକାରମାନଙ୍କ ପାଇଁ ପ୍ରେରଣାର ଉତ୍ସ ସାଜିବ। ମୁଁ ଜ୍ୟୋତିର୍ମୟୀଙ୍କର ଏକ ଉଜ୍ଜ୍ୱଳ ଏବଂ ସମୃଦ୍ଧ ଭବିଷ୍ୟତ କାମନା କରୁଛି।”
“ଇଣ୍ଡିଆନ୍ ଆଇଡଲ୍ ସିଜନ୍-୧୬ ର ବିଜେତ୍ରୀ ହୋଇ ଓଡ଼ିଶାର ନାମ ଗୌରବାନ୍ୱିତ କରିଥିବା ଆମ ମାଟିର ଝିଅ ଜ୍ୟୋତିର୍ମୟୀଙ୍କ ଏହି ସଫଳତା ଯୁବପ୍ରତିଭାମାନଙ୍କ ପାଇଁ ଏକ ବଡ଼ ପ୍ରେରଣା।” — ମୋହନ ଚରଣ ମାଝୀ, ମୁଖ୍ୟମନ୍ତ୍ରୀ
ଜ୍ୟୋତିର୍ମୟୀଙ୍କ ଏହି ସଫଳତା ପରେ ସାରା ଓଡ଼ିଶାରେ ଉତ୍ସାହର ଲହରୀ ଖେଳିଯାଇଛି। ରାଜ୍ୟର ସଂସ୍କୃତି ଓ ସଙ୍ଗୀତ କ୍ଷେତ୍ର ପାଇଁ ଏହା ଏକ ଗର୍ବ ଓ ଗୌରବର ମୁହୂର୍ତ୍ତ ବୋଲି ବିଭିନ୍ନ ମହଲରେ ଚର୍ଚ୍ଚା ହେଉଛି।